Gedanken: Libyen, UN, Däitschland & Lëtzebuerg

Däitschland ass dat eenzegt Membersland vun EU an NATO am UN Secherheetsroot wat géint d’Resolutioun ass, resp. géint en Deel dovun. Witzegerwéis kritt d’Unioun an d’FDP dofir am meeschten Luew vum Äerzfeind, der Linkspartei — och wann déi Lenk am Generellen de Léit enger kloërer Vue vun hierer Aussepolitik schelleg bléiwen. Souguer déi Gréng an Däitschland schwätzen sech fir d’Flugverbotszone aus an dat ass, wann een d’Geschicht vun däer Partei kuckt, net esou selbstverständlech (e.g. Kosovo & Afghanistan Debatt).
Den Ausléiser vum Problem an Däitschland ass awer, an dat dierft enger bestemmtener Lieserin vum Blog net gefaalen, de Kant. Seng Philosophie gouf an dat däitsch Grondgesetz geluecht. A séng Philosophie giff all Agreff an engem aaneren Staat als falsch bezeechnen.

Lo kann een awer behaapten dass déi aktuell Situatioun an Libyen keng gewaltsam Anmeschung ass. Kloër gouf op Ofwiersystemer geschoss, kloër sinn Kampfjets iwwert Libyen, mä d’Aktioun gett — an dat huet een geschter ganz gudd gesinn — eigentlech geleet vu Frankräich. Den Elysée huet schons vrun enger gudder Zäitchen den “National Transition Council” zu Benghazi als offiziell Regierung vu Libyen unerkannt. Déi Regierung (an de Medien als Oppositioun bezeechent) huet schons d’läscht Woch déi international Communitéit no Hellef gefroot. Dunn huet d’Conference vun den Islameschen Staaten (erkennt de Council och als Regierung un) eng Flugverbotszone gefuerdert, dunn huet d’Arabesch Liga, déi de Council zu Benghazi och als Regierung vu Libyen gesäit, sech op eng Flugverbotszone geenegt… an dunn… no laangem Diskutéieren och endlech den UN Sëcherheetsroot. Zebehaapten et wier eng Interventioun vum Westen fir un den Uelleg zekommen ass demno komplett falsch, well éischtens ass et net méi d’Bush Doctrine déi gellt, mä d’Obama Doctrine an zweetens…

…helleft déi Resolutioun — an dat Argument kann een definitiv maachen — der Regierung vu Libyen (Benghazi) nemmen fir hier legitime Souveränitéit iwwert hieren Territoire zereck zegewannen. Net méi, awer och net manner.
D’Resolutioun ass awer, an do muss een déi Responsable (Frankräich, de UK, an aanerer?) extrem luewen, zimlech vague geschriwwen. De Faite dass d’Resolutioun “all necessary measures” erlaabt fir d’Bevëlkerung zebeschützen, ass e Quasi-Blankocheck vum UN-Secherheetsroot.
China an Russland hu bekanntlech sech bei der Ofstemmung enthaalen. Fir d’éischt hunn ech geduercht dass se 1) d’Saach giffen ennersetzen (wat mech am Fall vu beide Länner iwwerascht huet/iwwerasche géif); oder 2) se eppes aaneschteres versprach kritt hunn wann se hiere Veto net giffe benotzen.
Wann ech lo d’Reaktiounen aus Moskau liesen, muss ech (1) ausschléissen, während (2) bekräftegt gett. Allerdengs kennt nach eng drëtt Méiglechkeet dobäi: béid Länner hunn d’Resolutioun net gelies, oder net richteg verstaanen.

Zum Schluss wier et och interessant gewuer zeginn op Lëtzebuerg déi Resolutioun matgestemmt hätt. Lëtzebuerg probéiert schliesslech fir e Setz am UN Secherheetsroot (2013-2014) zekréien. Hätt den Jean Asselborn decidéiert fir d’Resolutioun z’ennerstetzen, hätt een dogéint gestemmt oder sech wéi de Guido Westerwelle en Donneschten enthaalen?