USfAkten (1): Sou spillt sech den Iowa Caucus of Reply

(Eng weider nei Serie an dësem Wahljoer. E puer Fakten zum amerikanesche Wahlkampf, déi een (oft) an der normaler europäescher Press net kritt)


No méintelaangem Geschwätz (a vill Suen sammelen an ausginn) start Amerika d’nächst Woch mam Iowa Caucus a säi Presidentschaftswahljoer. Een Caucus ass keen Primary an och keng richteg Wahl, a béid Parteien gi komplett verschidde vir. Een Iwwerbléck.

More…

12 Rieden (1): D’Militär an dem Eisenhower seng Farewell Ried Reply

(Eng (vu villen) neie Serien an dësem amerikanesche Wahljoer. Ech kucken zréck op 12 Rieden, déi eng wichteg Roll an der amerikanescher an zum Deel an der internationaler Geschicht gespillt hunn. All Kéiers um Joresdag vun der Ried gett et hei e Post mat Erklärungen an dem Audio vun der Ried.)


Haut vru 55 Joer, kuerz ier de President Kennedy seng berühmten Untrëttsried (Ask not what your country can do for you, ask what you can do for your country“) ginn huet, wor et säi Virgänger deen eng aner, awer dowéinst net manner wichteg Ried ginn huet.

More…

Pellets – Europa holzt fir Klimaziler de Bësch an Amerika of 2

D’nächst Woch ass de groussen Ëmweltsommet COP21 zu Paräis. No de katastrofalen Deeg vu Kopenhagen vrun e puer Joer soll elo an der franséischer Haaptstad endlech e Schrëtt no vir gemaach ginn. D’Europäesch Unioun gesäit sech hei an der Pflicht, an dat net nëmmen well een ‘Gaaschtland’ vum Sommet ass. Gréng Energie a Skandinavien, ‘Energiewende’ an Däitschland, Atomstroum a Frankräich etc. d’Europäesch Unioun soll – och nom VW Skandal – endlech nees kenne als e weltwäite Musterschüler do stoen. De Problem ass just, dass d’Welt eben net sou schwaarz/wäiss ass.

An der Europäescher Unioun ass déi meescht genotzten ‘erneierbar Energie’ nämlech net d’Wand- oder d’Solarenergie an och net d’Atomkraaft, mä d’Holzenergie. Biomass, wéi et vu senge Befürworter genannt gëtt, steet fir ronn 50% vun den erneierbaren Energien an Europa. Obschonns de Kontinent ronn 3/4els vun der weltwäiter Photovoltaic Solarenergie huet, dominéiert queesch uechter Europa d’Energie duerch Holz. A Polen a Finnland beispillsweis steet den Taux bei 80%, a bei eisen däitschen Noperen bei bal 40%.

Zënter e puer Joer gesinn d’EU Staaten d’Holzpellets als ‘gréng’/CO2 neutral Energie un. Et ass een integralen Deel vun der EU hire Klimaziler (20% gréng Energie bis 2020). Wann Europa ‘just’ op Solar- a Wandenergie géif setzen, kéint een dat Zil definitiv net erreechen. Mat Holzpellets ass et machbar, an dëst och well doduerch d’Kuelekraaftwierker an Europa solle verschwannen.

Laut der Lobby ass d’Pellet Energie CO2 neutral. Et soll schliisslech just Holz benotzt ginn, wat soss net méi ze gebrauchen ass. Et solle keng Beem ofgerappt an zerklengert ginn. En plus, solle weider Beem ugeplanzt ginn. Esou huelen, laut der Theorie also, déi nei geplanzte Beem minimum deen CO2 Ausstouss, deen d’Holz duerch d’Verbrennung hierstellt, nees op. Ëmmer méi Etuden vun Ëmweltorganisatiounen aus den USA soen awer elo dass dës Rechnung net wierklech opgeet.

Pellets-EU

Duerch d’Astufen vu Pellets als ‘gréng’ Energie an der Europäescher Unioun an den domat verbonnen Subsiden vun europäesche Regierungen fir hir Bierger – och zu Lëtzebuerg kritt de Bierger fir d’Benotzung vun Holzpellets Subsiden (Gesetz vum August 2005) – ass d’Nofro no dëser Energie an de läschte Joren ganz ferm gestiegen. Haut läit se wuel esou héij, dass se net méi ouni d’Ofholzen ze packen ass. Laut der UN hirer Food and Agriculture Organization ass déi weltwäit Produktioun vu Pellets 2013 ëm 12% geklommen. Ween awer seng Klimaziler well erreechen ka net säin eegene Bësch ofholzen an Europa léisst dofir och d’Fangeren do dovun.

Wéi déi offiziell Säit vum EU Parlament ganz houfreg matdeelt si 4% vun der weltwäiter Bëschfläch (159mio Hektar) an der EU ze fannen. 38% vun der Gesamtfläch vun der EU si Bësch. De Bëschbestand huet säit dem 20. Joerhonnert a ganz Europa nees liicht zougeholl. All Joers deent sech d’Fläch vu Bëscher an Europa ëm 0.4% aus. Dëst huet eng wichteg Ursaach: méi Bësch heescht méi CO2-Zertifikater. Mat esou Zertifikater kann ee sech da ‘fräikafen’, wann een op anere Punkten, bspw. dem Tanktourismus, e bësschen duerch d’Fangere kuckt.

„It is the EU that has prompted this industry explosion“ (Hammel, NRDC)

Europa kann, oder well, net säin Bësch ofholzen a geet dofir seng Holzpellets gréisstendeels an Amerika sichen. D’USA sinn haut de gréissten Exporteur vu Pellets op der ganzer Welt. Am amerikaneschen Südosten wiisst déi Industrie praktesch nëmmen esou aus dem Buedem.

Am Joer 2011 huet Enviva, wat de gréissten Exporteur vun Holzpellets ass, seng grouss Fabrik zu Ahoskie am US Staat North Carolina opgemaach. 850,000 Tonnen Holz ginn do all Joer a wonnerschéin kleng Pellets verschafft, an da mat Schëffer an d’Europäesch Unioun bruecht. Ab 2016 well Enviva 8 Holzpellets Fabriken vu Virginia bis Mississippi operéieren. Déi britesch Firma Drax well a noer Zukunft 4 Fabriken an de Staaten Mississippi, South Carolina a Louisiana opmaachen. Am US Staat Georgia huet déi däitsch Firma RWE eng grouss Pellets Fabrik stoen. Am Ganzen hunn tëschent 2010 an 2015 ronn 20 Fabriken an där Regioun mat der Produktioun vu Pellets ugefaangen; et si minimum 30 weiderer geplangt.

Wéinst de grousse Klimaziler an der EU rechent d’Industrie an den USA domatter dass sech d’Zuel vun de Pellets bis 2020 kéint ver-10-fachen. Déi Form vun Energie kéint, sou gëtt geschat, bis dohin eng $11.5 Milliarden weltwäit produzéieren. Pöyry Management Consulting vu London rechent bis dohin mat enger Nofro vu 46 Milliounen Tonnen Holzpellets.

Etuden weisen op Kalschléi hin

An den amerikanesche Südstaaten leien 90% vun der Bëschfläch a privaten Hänn. Duerch d’Feelen vu staatlecher Hand, ass et natierlech extrem ‘einfach’ fir grouss (europäesch) Betriber fir dann hei esou Fabriken opzemaachen. D’Bëscher aus dëser Regioun hu bis elo 15% vum CO2 Ausstouss vun de ganzen USA opgeholl. Et ass dat ee Grond firwat zënter e puer Méint lues awer sécher e Widderstand géint dës Fabriken an déi Form vun Energie wiisst.

D’SELC (Southern Environmental Law Centre) hält a sengen Etuden beispillsweis fest dass Enviva och ganz Beem ofholzt fir Holzpellets hierzestellen – verschidde Beem wieren ëm déi 100 Joer al. D’Foto’en vun dëser Ofholzung huet hiren Affekot Carter e.a. och un d’EU weidergeschéckt; bis elo blouf dat awer ouni Konsequenzen fir d’Industrie. Och d’NRDC (Natural Resources Defense Council) kennt zu där nämmlechter Conclusioun wéi d’SELC. Si hunn e.a. festgehalen, dass Beem laanscht de Roanoke River (Virginia & North Carolina) verschwonne sinn. D’Géigend rondrëm dëse Floss an de ganze Süden vun Appalachen ass ee vun de läschte gréisseren Ecosystemer an de Südstaate vun den USA an zielt zu enger vu de läschte gréisseren Biodiversitéitsregiounen vun der ganzer Welt. Eng Etude vun der SELC an der National Wildlife Federation iwwert d’Enviva Ahoskie Fabrik koum zur Conclusioun, dass iwwer 168,000 Hektar Bësch am grousse Risiko stinn alleng vun dëser enger Fabrik ofgeholzt ze ginn.

Dat kritiséiert och d’Dogwood Alliance, déi sech zënter 1996 fir de Schutz vu Bëscher an den US Südstaaten (vu Virginia bis hin zu Arkansas) asetzt. Laut dëser Ëmweltorganisatioun, si ronn 60% vun ‘hire’ Bëscher an Feuchtzonen haut vu Kalschléi betraff. Domat klëmmt op der enger Säit e.a. och d’Gefor vun Iwwerschwemmungen an dëser Géigend an, op der anerer, bréngt dëst och eng Senkung vum propperem Drénkwaasser Schutz mat sech.

Wëssenschaftler hannerfroen ‘CO2 neutral’ Statement

Mécht dëst awer alles Sënn? ‘Means justify the ends’? Net wierklech. Well een sech lues a lues ëmmer méi secher ass, dass eben och ganz Beem ofgeholzt an zu Pellets verschafft ginn, géif d’Benotzung vun dësen Holzpellets, sou den Tim Searchinger vun der Princeton University, d’CO2 Emissiounen am Verglach mat der knaschteger Kuelenenergie ëm 79% vergréisseren. Dës Vergréisserung géif bannent de nächsten 20 Joer stattfannen; an de nächste 40 Joer wier et e Plus vun 49% CO2. Eng CO2 Neutralitéit, déi d’EU haut schonns an dëser Form vun där Energie gesäit, kéint villäicht eréischt an 100 Joer lues antrieden, wann déi nei geplanzte Beem grouss genuch gi sinn fir de villen CO2 opzehuelen. Dëst läit net zu läscht och dorunner dass d’Pellets verschafft an transportéiert musse ginn – oft an „ëmweltfrëndlechen“ Diesel Transporter Richtung Europäesch Unioun.

„Vum Point de Vue wat aus dem Schaachtech erauskënnt, ass Holz méi schlëmm wéi Kuelen,“ seet de William Schlesinger, fréieren Dean vun der Nicholas School of Environment vun der Duke University a North Carolina. De Schlesinger wor een vu bal 100 Wëssenschaftler déi d’läscht Joer een oppene Bréif un déi amerikanesch Ëmwelt Agence EPA geschéckt hunn. Si fuerderen dass een, wéi een dëst am Verglach mat Europa schonns bei den Autoen gemaach huet, an den USA vill méi streng Regelen ëmsetzt wat d’Benotzen vu Biomass Energie ugeet. Ob d’EPA eppes ënnerhëlt ass nach net kloer. Villäicht liest se awer bei hirer Recherche och dëse Saz vun hirem europäeschen ‘Homologue’, der EEA, aus dem Joer 2011:

„[unzehuelen dass] Verbrennung vu Biomass vu sech aus CO2 neutral ass (…) ass falsch (…)“ [1]

Festzehalen bleift dass een um COP21 zu Paräis net nëmmen muss op den CO2 Ausstouss vu China an den USA kucken. Och d’Verhalen vun den europäesche Staaten misst kritesch diskutéiert an hannerfrot ginn. Aktuell gëtt et wuel leider keng Regioun op dëser Welt déi eng wierklech perfekt Figur bei dësem esou wichtegen Thema ofgëtt.

COP21

Säit 2: Footnotes a Links mat weideren Informatiounen.

E liicht surreale Moment. Reply

Et wor e liicht surreale Moment beim 1. TV Debat vun den Demokraten fir d’Presidentschaftswahlen 2016. Do gëtt et eng Ënnersichung vum US Kongress an, vill méi wichteg, eng Ënnersichung vum FBI géint déi fréier Ausseministesch Hillary Clinton, déi als Ausseministerin e privaten (a, während enger Zäitchen, net geschützten) Emailserver benotzt huet an doriwwer ‘classified’ Informatiounen verschéckt huet, … a keen interesséiert et. “Enough about the damn emails,” sot de lénken Ex-Senator vu Vermont, an aktuell gréissten Clinton Konkurrent, Bernie Sanders. Déi aner 3 Männer – de fréieren Governor vu Rhode Island Lincoln Chafee, de fréieren US Senator Jim Webb, an de fréieren Governor vu Maryland Martin O’Malley – hunn dem Sanders Recht ginn a sinn dem Hillary Clinton zur Säit gesprongen. De Salle, dee mat Demokraten gefëllt wor, huet gejubelt. 

Mat engem Laachen – an engem Handshake mam Sanders – huet d’Clinton déi Story, déi sech zënter Méint duerch hir Campagne zitt, op d’Säit geluecht. De CNN Starmoderator Anderson Cooper, deen wuel nieft dem Clinton de bescht preparéiersten Mënsch am Sall wor, konnt souvill op d’FBI Ënnersichung hiweisen wéi hien wollt, de Salle an d’Kandidaten wollten net driwwer schwätzen. 

Do huet et och net gehollef wéi de Cooper sot, dass och de President Obama de Weekend kloer gemaach huet dass et eng ‘legitime’ Ënnersichung an d’Behuelen vun enger US Ausseministerin ass. Gëschter Owend huet d’Clinton zwar den Debat (op deem Punkt) gewonnen, mä ob e Republikaner/in d’Clinton esou liicht an enger ‘General Election’ Campagne wäert dovu komme loossen dierft bezweifelt ginn. Den Emailserver huet dem Clinton seng ‘Vertrauen’ Wäerter an de Keller bruecht; si sinn elo um déifste Stand zënter Ufank de 1990er. De Focus op ‘Gender Equality’, bezuelten ‘congé parental’, a Waffenschutz ze leeën dierft wuel net duer goen. (Obwuel beim Thema Waffen de Sanders, deen géint gréisser Gesetzer bei dësem Thema ass, liicht un d’Strauchele komm ass; Clinton koum dofir beim Thema Wall Street Reform, en Haptuleies vum Sanders, ebenfalls un d’Strauchelen).

De Faite, dass keen d’Clinton op dësem (Email) Punkt attackéiert huet, ass e staarke Kontrast zu de Wahlen 2008. Wéi e Memo vun der Obama Campagne 2008, deen gëschter Mëtteg publizéiert a vum deemolegen Chefstrateg David Axelrod op CNN als ‘original’ konfirméiert gouf, nach eemol ganz kloër weist, hat de Senator vun Illinois deemools eng aner Taktik. 

“[Clinton is] driven by political calculation not conviction, regularly backing away and shifting positions on issues (…)”

Et ass dat e Saz aus deem 2007 Memo, deen den Obama a senge Rieden & TV Debats mat Beispiller kloer eriwwer bruecht huet. Et attackéiert dem Clinton säi Charakter. Eng Rëtsch vun de fréieren Obama Supporter, déi, wéi Ëmfroen weisen, nach net wirklech voll hannert dem Clinton stinn, dierften der Meenung sinn, dass dëse Saz och haut nach d’Clinton gutt beschreift.

Net méi spéit wéi dëse Mount huet d’Hillary Clinton e Fräihandelsofkommes am Pazifik TPP ferm kritiséiert, wat et virdrun x-Mol als “gold standard” vu Fräihandelsofkommes’en bezeechent huet. Grond? D’Majoritéit vun Demokraten – dominéiert vun de Gewerkschaften – ass net begeeschtert vun TPP. Fir hire Vote zum Irakkrich, deen 2008 fatal am Kampf géint den Obama wor, huet d’Clinton sech eréischt 2013 entschëllegt. A bei der ‘Keystone Pipeline’, déi Pëtrol vu Kanada aus an d’Südstaaten vun den USA soll bréngen a bei gréngen Demokraten dowéinst ganz onbeléift ass, huet d’Clinton sech och erréicht vru Kuerzem zu enger Positioun entscheed. (Si ass dogéint – zumindest bis zur Convention d’nächste Summer). Ähnlech huet d’Clinton bei LGBT Rechter gezéckt bis hat se ënnerstëtzt huet – et ass ee Grond firwat den Joe Biden a net d’Hillary Clinton dëst Joer d’Keynote um alljährlechen HRC Iessen huet dierfte ginn.

Déi politesch Berechnungen sinn et déi d’Clinton, haut genee esou wéi 2008, “kal” ausgesi loossen. Um Dënschdeg den Owend zu Nevada stoung keen op der Bühn deen dat konnt, oder wollt, ausnotzen. Deen eenzegen Kandidat, deen et wuel kéint an deen vun engem ‘SuperPAC’ e Message just vrum Debat kritt huet (eng weider “Joe, run.” TV Reklamm déi direkt vrum Debat op CNN gelaaf ass), ass de Vize President Joe Biden.

Hien ass alles anescht wéi ‘berechenbar’, wéi x Beispiller vu ‘Gaffes’ (Ausrutsche/Faux pas) beweisen. Ob hien an d’Course geet oder net, weess wuel just hien. Duerch seng Idealer a seng (perséinlech) Schicksaler krut hien eng ganz aner Perséinlechkeet; eng mat scheinbar vill méi ‘Häerz.’ D’Clinton a seng Konkurrenten hunn him déi läscht Nuecht nach eng kléng Dier opgehalen. Eppes ass kloer, wann e Biden an d’Course geet, muss hien d’Clinton attackéieren “wou et richteg wéi deet” (aka hire Charakter). Drock vum Obama kritt de Biden net, säi Support – zumindest dee mentalen – dierft him awer sécher sinn. Obamas a Clintons wor vun Ufank un just eng ‘Aarbeschtsrelatioun’, keng Frëndschaft. Et huet een einfach 2 verschidde Virstellungen dovunner wéi PolitikerIn/PresidentIn solle sinn. “Et gëtt een Ënnerscheed ob een well President ginn oder ob e President ass,” sot den Obama d’läscht Woch op enger Pressekonferenz wéi hien op dem Clinton seng nei Syrien Strategie ugeschwat gouf. Méi kloër konnt hien sech net ausdrécken… 

email


Den Obama 2007 Memo, “How to beat Hillary” vum Ryan Lizza – http://www.newyorker.com/news/news-desk/how-to-beat-hillary-clinton [en] (New Yorker)

Euro, Flüchtlingen, Klima etc. – “The Testament of Youth” Reply

Ech hunn dëse Summer dem Vera Brittain säin Testament of Youth gelies. D’Brittain ass am 1. Weltkrich grouss ginn, a bezeechent sech am Buch als ‘abysmally ignorant’ an ‘romantically idealistic.’ Hat wor demno, wéi vill anerer och, een einfacht Opfer fir d’Propaganda: ‘Et gëtt e schnelle Krich. Dono gëtt et ni méi e Krich.’ Dir kennt et.
Nach ier de Krich ausbrécht, packt d’Brittain et fir op d’Oxford University Literatur studéieren ze goen. Do ass d’Vera awer esou séier ‘disturbed by the tranquility with which elderly Oxford view spring-time death for its young men’, dass hat am Juni 1915 seng Studien op Äis leet a Krankeschwëster gëtt – fir d’éischt zu London, dono un der Front a Frankräich. Un der Front pflegt et britesch an däitsch Zaldoten, déi, wéi et an engem Bréif u säi Verlobten Roland schreift, hien wuel nach kuerz virdrun probéiert huet ëmzebréngen… a vice versa.

„Those dreams of happiness we thought secure“

D’Vera sollt säi Kapp a Rou leeën, schreift de Roland, hien wier elo e Stéck hannert der Front. 

Dat ass de läschte Bréif, deen de Roland fort schéckt. Hien gëtt vun engem Sniper erschoss a stierft een Dag vrun Helleg Owend 1915 am Alter vu just 20 Joer. Et brécht dem Vera Brittain säin Häerz – eng 1. Kéier.

2 Kollegen vum Vera a Roland stierwen am Abrëll 1917 resp. Juni 1917. E Joër méi spéit, a just 5 Méint vrum Ënn vum Krich, gëtt dem Vera säi Brudder Edward bei enger Géigenattack vun den Éisterräicher an Italien erschoss. D’Häerz ass fir déi 2. Kéier gebrach.

Nom Krich engagéiert sech d’Brittain als Pazifistin, e.a. beim UNO-Virgänger ‘League of Nations.’

Et sollt direkt gesinn näischt bréngen. Hir Generatioun, zënter dem Hemingway sengem A Moveable Feast, als ‘génération perdue’ bekannt, muss bekanntlech nach eemol e Weltkrich matmaachen. An dono kennt souguer nach e Kaale Krich mat der Haptzentral Europa.

vera brittain

Ech hu beim Testament of Youth oft un d’Situatioun vun haut geduecht. Zum Deel well d’EU haut wuel a senger gréisster Kris iwwerhapt stécht, an een déi typesch Gläichung „EU = Fridden; keng EU = Krich“ vun Elteren a Grousselteren vermëttelt krut, awer och wéinst der d’Situatioun vun enger anerer jonker europäescher Generatioun. Eigentlech leien eng ronn 100 Joër tëschent menger Generatioun an där vum Vera Brittain, mä esou wäit ewech schéngt et vun de Grondprinzipien hir net: Europa gëtt nationalistesch; grouss Länner soe méi klénge Länner wat se ze maachen hunn; eeler Politiker decidéieren eppes wat gréisstendeels déi Jonk wäert treffen.

Dem Brittain seng Generatioun huet sech mat voller Freed an e Krich gepucht. Mir hunn, mat eisen Elteren, nom 11. September vill vun eise Fräiheeten – ouni grouss nozefroen – opginn.
De Krich, deen just e puer Méint sollt daueren, ass herno 4 laang Joren am Gaangen. D’Sich nom Bin Laden dauert – trotz international sou grousser Cooperatioun – bal 10 Joer.
Den Traité vu Versailles sollt een 2. Weltkrich mat sech bréngen. Den Doud vum geféierlechste Mann zënter 1945 sollt weider Iwwerwaachungen, Fräiheetsaschrénkungen an dem „IS/ISIS“ Platz maachen.

Nom 11. September koum den 11. Mäerz (Madrid), an de 7. Juni (London). Et koum den Al Gore mat enger PowerPoint Presentatioun. Et koum eng Weltwirtschaftskris, déi zu massiver Jugendarbechtslosegkeet, enger EU Scholdekris, Eurokris a schlussendlech wuel zu enger EU Kris gefouert huet. Déi allerspéistens elo mat der Flüchtlingskris vun dësem Summer komplett gouf.

„[We need to put an end to] the world … of Great Powers and Little Nations“


Vrun der Summervakanz sot de Lëtzebuerger Ausseminister Jean Asselborn um radio 100,7 dass d’EU Institutiounen, wéi een se haut kennt, am Joer 2050 wuel net méi existéieren. 2050, wat e Joer ass wou d’Geschicht een éischten richtege Bilan vu menger Generatioun wäert zéien, huet d’EU wuel also entweder nei Institutiounen/eng politesch Unioun oder dësen europäesche „Friddensprojet“ brécht ausserneen.

Den Taux de Support fir déi „ever closer union“, déi am Traité de Rome festgehale gouf, läit aktuell bei grad emol 35%. Zemools déi iwwer-55 Järeg stinn dëser Integratioun am kriteschsten géigeniwwer; just 31% fannen dës gutt. Bei Jonken (< 34 Joer) loung den Taux de Support bei 41% – deem héchsten vun allen Alterskategorien. Duerch méi Kooperatioun um europäesche Niveau an och duerch méi Muecht fir europäesch Institutiounen wieren déi aktuell Krisen an Europa ze bewältegen, sou déi 41 Prozent.[1]

Bei den iwwer-55 Järegen krut zemools d’Äntwert dass d’EU Integratioun „ze wäit“ gaangen ass vill Zoustëmmung; méi wéi all 3. vun hinnen gesäit d’Situatioun esou.[1]

Ass dat dat wat mer wierklech wellen; jiddereen nees zréck a säin Eck? Dass d’Leit aus der ‘verluerener Generatioun’ vu vrun 100 Joer hirt Liewen op d’Spill gesat hunn just fir dass de „Friddensprojet“ deen eng Rëtsch Joren dono sollt kommen, mat deene Leit vun der ‘verluerener Generatioun’ vum 21. Joerhonnert – déi, déi während oder kuerz vrun der Grousser Rezessioun op den Arbeschtsmarché gestouss sinn – nees ophält? E Visa fir den FC Metz kucken ze goen, eng Band op Bréissel lauschteren ze goen, oder op Tréier akaafen ze goen? E Studenten Visa fir op Léck oder München studéieren ze goen? Eng Aarbescht ‘am europäeschen Ausland’ refuséiert ze kréien, well een eben Auslänner ass?

D’EU ass méi wéi „just“ e Friddensprojet. Et ass d’Idee dass d’Vëlker vun Europa och kennen mateneen, a net just niewenteneen, liewen. Déi nächst puer Méint a Joren gi wuel decisiv fir déi Idee, cf. Griicheland, Spuenien, Italien (e.a. Lega Nord), Frankräich (Le Pen), Éisterräich (FPÖ) a UK (Referendum). A während déi génération perdue esou genannt gouf, well e.a. vill intelligent Jonker am Krich gefall sinn an anerer orientéierungslos woren, esou muss dës verluere Generatioun probéieren hir Ideen an Europa ëmsetzen. 

Et muss een aktiv ginn.

De Referendum am Juni huet gewissen wéi grouss d’Aarbecht ass. Jonker géifen, huet et do e.a geheescht, sech net genuch fir Politik interesséieren. Jonker si vrun 100 Joer fir dëse Kontinent ëmkomm, a Jonker sinn déi, déi de Kontinent am Moment am meeschte wëlle weider bréngen. Grouss Verännerungen koumen ëmmer duerch Jonker. Dat huet och de Jean Asselborn an deem genannten Interview eigentlech behapt wéi e sot dass eng aner Generatioun muss u politesch Hiewele kommen fir d’EU ze reforméieren/z’erneieren. 

Dofir et gëtt Zäit, dass eis Elteren a Grousselteren eis mat upaake loossen. Um politeschen Niveau hu se dat zwar – zu Lëtzebuerg – zu engem gewessen Deel am Juni kloër refuséiert, mä nach weess keen ob deen ‘Nee’ emol eng Kéier vu Politologen als positiv bewäert wäert ginn. Um sozialen Niveau kann een keen stoppen, an dëst hunn dëse Summer och 2 jonk Lëtzebuerger bei hirer Sammelaktioun fir Flüchtlingen gewissen. Et woren keng 50+ Järeg, et wor keng Caritas an och keng Asti, déi sou eng Aktioun gestart an iwwert d’Bühn bruecht hunn. Et woren 2 jonk Leit.

Egal wat mer maachen… eis Jugend ass eriwwer. Entweder gi mer all déi Problemer, déi op eis bis 2050 duerkommen (an, wéi Flüchtlings- oder Klimakris, zu engem Deel haut schonns bekannt sinn) elo mat Vollgas un oder mir gi wuel wirklech déi éischt déi, wéi den Al Gore a sengem Film sot, vun eisen eegene Kanner enges Dags gefrot ginn, wat mir dann eigentlech selwer gemaach hunn… an dëst ebe net nëmmen beim Thema Klima.

Vera _Quote


Dem Vera Brittain säi Buch ‘Testament of Youth’ kritt een e.a. hei ze kaafen. D’Buch ‘Letters from a Lost Generation: First World War Letters of Vera Brittain and Four Friends’, an deem d’Bréifer dra sinn déi sech d’Frënn während dem Krich geschéckt hunn, ass e.a. hei ze kréien.

USA vs EU, Football vs Fussball oder Sozialismus vs Kapitalismus Reply

Elo geet et nees lass. Déi ‘schéinste Niewesaach’ vun der Welt ass nees zréck. Fir déi eng ass dëst mat déi schéinsten Zäit vum Joer, fir déi aner eppes wat se net kenne no vollzéien.

Fever Pitch (Zitat)

(Zitat aus dem Film ‘Fever Pitch’; Bild: cc)

An Europa bedeit zemools de Fussball fir Millioune vu Leit ganz vill, an Amerika zielt dat nämlecht fir de ‘Football.’ Op béide Säite vum Atlantik fänkt déi nei Saison elo un. Den Zäitpunkt vum Saisonstart – am spéide Summer – ass ee vun de wéinege Punkten, déi béid Sportarten mateneen verbënnt. Politesch/economesch gesinn kéint den europäesche Fussball an den amerikanesche Football nämlech net méi verschidde sinn; an dëst kéint keng méi grouss Konsequenz op de Sport hunn. Eng kleng Analyse.

More…