Commentaire: Victoire vum ‘No’ dank dem grousse Versprieche vu London = grouss Reform am UK oder een 2. Referendum 2

Juli 2014: de “No” läit nach komfortabel vir an den Ëmfroen. 

Ufank August 2014: weiderhin iwwer 10% Virsprong fir de “No” vrun & no der 1. TV Debatt

Ënn August 2014: de “Yes” hëllt lues a lues op

kuerz vrum Referendum: “Yes” op 48-49%.

Dunn huet London ugefaangen op Schottland ze kucken. De fréiere Premier Gordon Brown gouf dohinner geschéckt, d’PMQs goufen ofgesoot, Premier, Vize-Premier & Oppositiounschef sinn a Schottland gereest. Mat aller Muecht dat verhënneren, wat elo eng richteg Possibilitéit ass: eng Victoire vum ‘Yes.’ 

An der Hektik & aus der Angscht eraus, gi Saache versprach. ‘Wielt “No”, a mir ginn iech méi Muecht!’ Déi britesch Devolution, eppes wat déi ganz Campagne iwwer keng Roll gespillt huet, sollt d’Rettung fir Better Together sinn. A Saachen wéi e.a. Sozialhellef & Steieren soll dat schottescht Parlament d’Muecht iwwer Schottland kréien. Op deenen Themen géif London sech eraushaalen. An passionnéierte Rieden huet de Gordon Brown d’Pläng virgeluecht. Hien huet dëst vollstänneg gemaach, ceci dit mat engem ‘Timetable.’ Bannend 9 Méint soll e groussen Deel vum Wee scho gemaach sinn. Kuerz drop sinn déi 3 grouss britesch Parteien – Konservativ, Labour & Liberal Demokraten – op den Zuch opgesprongen & déi 3 Leaderen, Cameron, Miliband, an Clegg, hunn et mat engem ‘Pledge’, deen an enger Zeitung ofgedréckt gouf, de schottesche Bierger versprach.

.

Problem mam grousse Verspriechen

Scho wéi d’Wahlbureau’en awer um Donneschdeg zougaangen sinn, koumen d’Stëmmen vun pro-UK Leit, dass “dat do esou net ëmzesetzen wier.” Zemools den Zäitplang vum Gordon Brown wier net méiglech – scho guer net well d’nächst Joer am Mee Parlamentswahlen am UK sinn. Dëst ass awer net deen eenzegen Grond. Méi Muecht fir Schottland ass einfach gesot, awer schwéier gemaach. Et heescht nämlech och méi Muecht fir Wales a fir Nordirland – eppes wat Westminster ni wollt & scho guer net no engem Referendum a just engem vun de 4 Länner.

Dat schwieregst um groussen Wahlverspriechen vu Better Together & Westminster ass awer déi sougenannten “English Question.”

Wat ass dat? Et ass eng Fro déi Politologen & d’Parteien an England zënter dem Ufank vun der Devolution beschäftegt. Während Schottland, Wales & Nordirland zënter e puer Joer hir eegen Parlamenter hunn (déi eng minimal Muecht hunn), esou huet dat 4. Land am UK – England – keen eegent Parlament. Westminster herrscht – bei villen Themen – iwwert de ganze UK, awer eben och, wéi bspw. bei den Tuition Fees fir d’Uni, um Niveau vu bspw. England & Wales an heiandsdo och just um Niveau vun England. Well Westminster awer praktesch e federalt Parlament ass, konnten schottesch & nordiresch MPs iwwert d’Erhéijung vun den Tuition Fees an England & Wales ofstëmmen. Verschidde Politiker awer och Journalisten, e.a. vum Telegraph, déi der Konservativer Partei no steet, fuerderen dass wann een Schottland méi Muecht gëtt dann och just englesch Parlamentarier kennen iwwert englescht Recht entscheeden. 

.

Konservativ: Léisung um nationale Plang

Während Labour & Konservativer déi läscht Deeg vun der Campagne, mam gemeinsamen Zil vrun Aan, eng eenzeg Sprooch geschwat hunn, esou war dat an der Nuecht op e Freideg & och um Freideg selwer net méi ganz esou harmonesch. 

Aus konservative Kreeser héiert een dass een Deel keen eegent Parlament fir England well an ebe just dass bei engleschen Gesetzer just englesch Parlamentarier zu Westminster dierften ofstëmmen. Dëst ass och d’Positioun vum Premier Cameron. En Deel vun senger Partei well dann och, logescherweis, absolut net dass et eng englesch Regierung gett. Dës ‘englesch Regierung’ soll déi nämmlecht sinn wéi déi vum ganzen Vereente Kinnékräich. Elo kéint een soen, dass dat méiglech wier, ass et awer net – jiddefalls net wann ee well zesummen an engem Staat liewen. Schliesslech heescht Muecht iwwer verschidde Steiereinnahmen ze hunn och eng Muecht iwwert e Budget ze hunn & wann déi UK Regierung och soll déi englesch Regierung sinn, dierft logescherweis just een Englänner nach britesche Finanzminister ginn. Dat nämmlecht zielt fir d’Sozialwiesen & all aaner Departement, deem seng Muecht (zumindest zum Deel) op déi 4 Länner soll opgedeelt ginn. Een schotteschen Bierger (wéi 2 vun de läschten 3 UK Finanzministern) oder e waliseschen oder och een nordireschen Bierger dierften déi Posten an enger UK Regierung op Grond vun hirem Heemeschtsland net iwwerhuelen. 

Dat Argument vun “2. Klasse Bierger” ass och de Grond firwat bis elo all Kommissioun, déi sech mat der ‘English Question’ befaasst huet, keng Léisung fonnt huet. Just englesch MPs d’Recht ze ginn iwwer englescht Recht ofzestëmmen gouf e.a. 2013 vun der McKay Commissioun ofgeleent, well et “2 Klassen vun MPs” géif aféieren.

.

Labour: Léisung um lokalen & regionale Plang

A während een Deel vun de Konservativen awer wuel an déi Richtung well goen, schwätzt och den aktuellen Oppositiounschef zu Westminster a Labour Leader Ed Miliband mat engem liicht aaneren Toun wéi an der Campagne. De Miliband hätt gäeren, dass Westminster an dat ganzt Vereenten Kinnékräich elo eng Debatt iwwert d’Zukunft vum Land féiert & dass een zesummen eng Äntwert op déi ‘English Question’ soll fannen. 

De Grond dofir läit an der politescher Ausrichtung vum UK a vum Land England. Een separat Parlament fir England oder souguer déi “light” Versioun (englesch MPs zu Westminster stëmmen iwwer englescht Recht of) spillt éischter der Partei vum David Cameron an d’Kaarten. Déi Konservativ dierften a béide Versiounen bal ëmmer d’Majoritéit hunn & domat dann och iwwert sou wichteg Themen wéi Steieren- & Finanzpolitik fir England entscheeden. Eng Labour Majoritéit misst e gréisseren demographeschen & sozialpolitesche Wandel oder een gréisseren ‘Landslide’ virausgoen. Dat 1. wäert et wuel net ginn, an de ‘Landslide’ kennt och just 1 Mol & dono selten bei enger Wiederwahl. Géif Labour bei UK Wahlen eng Majoritéit zu Westminster kréien awer am Recht vun England net, kéinten eng ganz Rëtsch Reformen/Gesetzesproposen an den 2 Modeller, déi déi Konservativ ‘proposéieren’, net duerch gefouert ginn. 

Dofir well Labour eng ganz aaner Äntwert op déi “English Question.” Hir Äntwert ass d’Muecht an England op méi een lokalen & regionalen Niveau ofginn. Firwat? Ganz einfach: Labour dierft da wuel e gutt Stéck méi Muecht an & iwwer England hunn wéi se dat am aktuellen oder an den 2 uewen genannten Versiounen wuel je hätten. Labour ass einfach méi stark um lokale Plang an England, cf. London, Liverpool, Manchester, Birmingham, York etc. De Miliband huet dofir dem David Cameron seng Pläng fir England ofgeleent. Hien sot zwar gëschter, dass hien um Zäitplang fir Schottland “wéilt” festhalen, awer huet och schon duerchblécke gelooss dass bei enger Labour Victoire hien eng ‘Constitutional Convention’ fir de nächsten Hierscht wéilt aberuffen. Dono sollen Legislatiounen proposéiert ginn, déi dann hiren politesche Laaf mussen huelen (e.a. vum Uewerhaus House of Lords gutt geheescht ginn; Miliband well komplett Reform vun deem Deel vum Parlament).

De Miliband huet virdru gewarnt, dass elo Spillereien gemaach ginn fir politesch besser do zestoen. Obwuel eigentlech béid Parteien dëst natierlech maachen. Et ass schliesslech Politik. 

.

Verspriechen muss ageléist ginn

Den Alex Salmond, de nach-First Minister vu Schottland, huet gewarnt, dass d’Schotten “[will] hold Westminster’s feet to the fire.” Alles aanescht wéi déi grouss Muechtännerung, déi a läschter Sekonn grouss versprach gouf, an am kléngen Zäitplang wéi et versprach gouf, an d’SNP an déi Gréng(?) wäerten wuel an e puer Joer een 2. Versuch starten fir onofhängeg ze ginn. Da wier déi ‘beschten’ Taktik vu Westminster eigentlech just nach e Referendum iwwert d’Onofhängegkeet net unzerkennen. Där Stëmmen goufen et an de läschte Stonnen vu Leit vun der ‘No’ Campagne, déi e Referendum “vläit ni méi” a Schottland zu deem Thema welle gesinn. Fir de Salmond war et eng ‘once in a generation’ Chance fir d’Schotten, mä hien huet um Freideg kloër gemaach, dass dat seng perséinlech Vue ass. Säin Nofolger, oder wuel besser gesot, seng Nofolgerin (Nicola Stuergeon) kéint eng aaner Vue zu engem 2. Referendum hunn…

… zemools wa London sech elo a Parteipolitik & Wahlkampf verdéift (de UK Treasury Minister & schotteschen MP Danny Alexander (LibDem) sot gëschter schonns ‘schottesch MPs d’Wahlrecht zu Westminster ewech ze huelen wor net vereinbart ginn’), an déi iwwer 1.6 Millioune Schotten, déi fir d’Onofhängegkeet gestëmmt hunn (e.a. iwwer 70% bei de ganz Jonken!) nees géif vergiessen. 

Et huet een e ganz grousst Verspriechen gemaach. Dat wuel gréissten a fundamentalsten an der Geschicht vun der moderner britescher Politik. Zäit fir déi Konservativ, d’Liberal Demokraten & d’Labour Partei fir dat dann och elo esou ëmzesetzen!

Schottland 2014: 10 Froen & Äntwerten zum Referendum. 1

Een Donneschdeg kéinten d’Schotten hir iwwer 300 Joer aal Unioun mat England nees opléisen. An der Geschicht goufen alt gréisser Kricher a Schluechten tëschent Schottland an England. En Donneschdeg entscheeden d’Leit per Referendum. Gréisser Auswierkungen op déi schottesch, déi britesch & déi europäesch Politik (an op Lëtzebuerger Studenten) huet dëst awer trotzdem. 

Hei sinn 10 Froen an Äntwerten zum Referendum:

More…

“Habemus Juncker!”

Zum Glëck huet den EU Conseil also elo e Mann nominéiert, deen finanzpolitesch Wäitsiicht huet… ;)

Februar 2008 – Immobilienkris an den USA, 7 Méint vru Lehman Brothers

“Et wäert an Europa [dest Joer] net zu enger Rezessioun kommen”, sot de Jean-Claude Juncker als Mister Euro. Während vill Economisten ugefaangen hunn vun enger méiglecher Rezessioun an den USA ze schwätzen, déi och hire gréissten Partner, d’EU, kéint treffen… wollt de Jean-Claude Juncker näischt dovunner wessen. Souguer déi no ënnen revidéiert Zuelen vun der IMF fir Europa huet de Jean-Claude Juncker verworf. D’EU bräicht och dowéint a noer Zukunft ‘aanescht wéi d’USA’ guer keen Stimulus Paak fir d’Economie unzekurbelen. Et wier alles an der Rei. 

(AFTX, “Euro group’s Juncker sees no recession in Europe this year”, http://www.finanznachrichten.de/nachrichten-2008-02/10027004-euro-group-s-juncker-sees-no-recession-in-europe-this-year-update-020.htm)

Abrëll 2008 – 5 Méint vru Lehman Brothers

De Jean-Claude Juncker mengt, dass d’Kris an den USA e puer Konsequenzen an Europa hätt. Et wier awer net esou dass déi Kris Europa giff ganz erreechen. Et handelt sech ëm eng Kris an den USA, déi d’EU zwar géif dat ganzt Joer 2008 beschäftegen… mä net voll géif treffen. Schued fir d’Eurozone kéint just duerch een ze staarken Euro kommen. 

(Reuters, “Juncker: Finanzkrise ohne dramatische Folgen für Europa”, http://de.reuters.com/article/economicsNews/idDEKOE61857620080416

Die Presse, “Juncker: Finanzkrise wird uns auch 2009 beschäftigen”, http://diepresse.com/home/wirtschaft/finanzkrise/376517/Juncker_Finanzkrise-wird-uns-auch-2009-beschaeftigen)

September 2008 – De Fall vu Lehman Brothers

De Jean-Claude Juncker seet d’Finanzkris ass nach net eriwwer, d’Auswierkungen wieren weiderhin “ungewiss.” Et géif zwar e Vertrauensverloscht ginn, mä d’Konsequenzen vum Fall vu Lehman Brothers géifen, laut dem Jean-Claude Juncker, net all ze hefteg ausfaalen. 

(NTV, “Juncker warnt – Finanzkrise nicht zu Ende”, http://mobil.n-tv.de/wirtschaft/meldungen/Finanzkrise-nicht-zu-Ende-article23473.html)

Präisser 

De Jean-Claude Juncker sollt fir dat Joer, a wat hien gesot & gemaach huet, herno e.a. den Titel “Schärfste Klinge des Jahres 2008″ kréien (via) an deen vum Europäeschen Bänker vum Joer (via). 

 

Mee 2009 – Puer Deeg vrun de Wahlen, 5 Méint ier Griichenland Kris ufänkt

Et sti Lëtzebuerg nach minimum 2 weider hart Joeren bevir, ier et nees de Bierg op geet, sou de Jean-Claude Juncker bei enger “Juncker on Tour” Ried zu Déifferdéng. “Es sind aber schon jetzt deutliche Zeichen von Stabilisierung und Konsolidierung erkennbar”, sou de Premier. Fir Lëtzebuerg huet de Premier e.a. versprach d’Scholdelaascht  net uwuessen ze lossen, a mam Titel “Zesummen Wuessen” hätt CSV och Léisungen fir den Immobilienmarché an de nächsten Joeren an de Grëff ze kréien. Béides sollt net geschéien.  

Hien huet de Leit op engem “Juncker on Tour” Event awer och versprach, dass wann si Leit wellen an der Regierung hunn déi elo an der Kris wessen wat muss gemaach ginn, dann dierften si net fir d’CSV stëmmen an net fir hien. 

(Luxemburger Wort, “Juncker redet Tacheles”, http://www.flickr.com/photos/pitschspics/3541316261/sizes/o/in/photostream/

YouTube, “Juncker: Stemmt e Sonnden weder fir d’CSV nach fir mech!”, http://www.youtube.com/watch?v=xC5XWcIBSfE)

Präisser

2009 hällt hien d’Laudatio fir de Josef Ackermann, deen den Titel “Europäeschen Bänker vum Joer” kritt. De Jean-Claude Juncker luewt den Ackermann e.a. dofir dass hien “Deutsche Bank” zu enger globaler Bank gemaach huet. Dobäi huet deen Mann net nëmmen massiv vill Leit entloos fir massiven Profit ze maachen, mä seng Taktik fir vill an déi US Immobilienblos z’investéieren/eranzegoen, huet d’Bank dunn iwwerhapt zu där grousser globaler Bank gemaach. An den USA gëllt se als eng vun de Banken, déi Schold un der Immobilienblos & domat der globaler Finanz- & Wirtschaftskris stinn. Eppes wat den Ackermann selwer 2008 zum Deel um ZDF zougett.

(Luxemburger Wort, “Juncker hielt Laudatio auf Josef Ackermann”, http://newwww.wort.lu/wort/web/letzebuerg/artikel/2010/11/125300/ehrendoktorwuerde-fuer-jean-claude-juncker.php;

Spiegel Online, “Kreditkrise bei Maybritt Illner: Die Ackermann Show”, http://www.spiegel.de/kultur/gesellschaft/kreditkrise-bei-maybrit-illner-die-ackermann-show-a-506988.html;

Public Integrity, “Data shows Deutsche Bank was key patron of questionable mortgage lenders”, http://www.publicintegrity.org/2011/04/18/4173/data-shows-deutsche-bank-was-key-patron-questionable-mortgage-lenders

SwissInfo, “Vom Buhman zum Liebling der Deutschen”, http://www.swissinfo.ch/ger/archiv/Vom_Buhmann_zum_Liebling_der_Deutschen.html?cid=633848

Bloomberg, “Bankers Learn What Happens in Vegas Can Lead Back to D.C.”, http://www.bloomberg.com/news/2014-05-02/bankers-learn-what-happens-in-vegas-can-land-back-in-d-c-.html)

Video Tipp:

Méi iwwert Deutsche Bank & dem Jean-Claude Juncker säi Kolleg, Josef Ackermann, an deenen hir Roll an der US Immobilienkris & domat der Weltwirtschaftskris souwéi der Eurokris, gëtt et e.a. an dëser ARD Dokumentatioun “Verzockt und verklagt – Die ‘Guten Geschäfte’ der Deutschen Bank”: http://www.youtube.com/watch?v=D1QB01nF0qg

 

 

EU 2014/LGBT: Dem Sylvia Camarda (DP) hiren politeschen (Net-)Asatz fir LGBT Rechter… [UPDATE]

UPDATE (8. Mee 2014; 11.55 Auer): D’Madame Camarda huet op Twitter op dës Diskussioun Stellung geholl. Si huet den Account vum homophoben Grupp “Schutz fir d’Kand” ent-followed a seet “‘sorry’ bei all denen dei ech verletzt hun!’ (Bild vun den Tweets). Dëse Blogpost soll demno just méi als e (Léier-)Beispill wat ‘Social Media PR’ an ‘Social Media Footprint’ ugeet ugesi ginn & wéi een eng gutt Aktioun vu sech selwer (ILGA Pledge ënnerschreiwen) duerch eng aner Social Media Aktioun (ongewollt) dann z’erstéiert & doduerch dann Froen zu engem senger richteger Positioun opkommen. 


Fir d’Europawahlen 2014 huet ILGA Europe e Pledge ausgeschafft, deen esou vill Kandidaten fir d’EU Parlament sollen ënnerschreiwen wéi nëmme méiglech. An deem ‘Pledge’ verspriechen déi jeeweileg Signatairen sech e.a. 


„I pledge to stand up for human rights and equality in Europe as a member of the European Parliament, including the human rights of lesbian, gay, bisexual, trans and intersex people (LGBTI).

I pledge to advance LGBTI equality by supporting the following actions:

– adopt an EU roadmap on LGBTI equality (…)

– actively work towards the adoption of a comprehensive anti-discrimination legislation (…)

– combat homophobic and transphobic violence (…)

– promote an inclusive definition of family in EU policies (…)

– make the EU the world champion of equality for LGBTI people (…)“

Zu Lëtzebuerg schafft ILGA Europe fir deen Pledge mat Rosa Lëtzebuerg zesummen. Momentan hu just bei der Piratepartei all d’Kandidaten_innen dat Verspriechen ënnerschriwwen. Et muss een sech awer haut schonns – also vrun de Wahlen! – Froen zu der Wierksamkeet vun deem ‘Pledge’ stellen – zumindest emol wat lëtzebuerger Kandidaten fir de 25. Mee ugeet. Wéi ech nämlech vrun e puer Deeg d’Lëscht nach eemol duerch gekuckt hunn, ass mer opgefall dass do e.a. d’Sylvia Camarda vun der DP drop steet. Dëst huet mech direkt e bësschen stutzeg gemaach. Firwat ass dat esou? 

Well ech mech froen, wéi een esou een Pledge kann ënnerschreiwen, an dann awer gläichzäiteg een vun de momentan just 25(!) Followers vun der homophober ‘Schutz fir d’Kand’ op Twitter ka sinn. Ass dat just massiv schlecht Online PR? Et stellt een sech jiddefalls domatter als Politikerin op béid Säiten vun dësem politeschen a sozialen Debat – gewollt oder ongewollt. Dat 1. wier fatal, dat 2. dann eben déi genannten massiv schlecht PR Strategie. Egal wéi ass dëst (op béid Säiten vun esou engem Debat ze stoen) wuel net onbedéngt dat Bild wat e Politiker/eng Politikerin well ofginn – zemools net sou kuerz vrun de Wahlen. Europa, an d’Politik am Allgemengen, brauch Leit, déi keng zweedäiteg Signaler senden mä entweder “Jo” oder “Nee” soen. 

Wann een béid Saachen niewenteneen setzt gëtt meng Reaktioun nach méi däitlech: wéi kann een verspriechen géint Gewalt baséiert op Homophobie & Transphobie zekämpfen a sech fir ‘Respekt an Unerkennung vun de Rechter vun LGBTI Famillen’ („to promote respect and recognition of the rights of LGBTI families“) am neien EU Parlament wëllen anzesetzen, wann een gläichzäiteg awer och een vun de wéinegen Followers op Twitter ass, vun enger Organisatioun, déi momentan aktiv géint LGBTI Rechter an LGBTI Famillen kämpft?

Eng Organisatioun, déi momentan an hirer Online Petitioun bei der Chamber behaapt dass den Homo Mariage automatesch och géif Dir opmaachen fir „polygamie, polyandrie, mariages de groupe etc.“ an een „accès à l’enfant (gestation pour autrie (GPA) pour les couples d’hommes“ kritiséiert. De Projet de Loi, deen den Homo Mariage & Adoptioun duerch LGBT Koppelen legaliséire géif, wier laut dem ‘Schutz fir d’Kand’ definitiv „anticonstitutionels“ & „contraires à l’intérêt supérieur de l’enfant et à l’intérêt général (…)“ [1]

Et ka sinn dass d’Sylvia Camarda déi Petitioun vu „Schutz fir d’Kand“ net gutt fënnt. Trotzdem werft dëst schon eng ganz Rei Froen zur Wierksamkeet vum ILGA Europa/Rosa Lëtzebuerg Pledge op. An zweetens, werft et och nach Froen zu der genannter Kandidatin an hire politeschen Iwwerzeegungen op. Den Twitter Account vum „Schutz fir d’Kand“ (@DfenseEnfantLux) gëtt et nämlech och eréischt zënter Ufank Abrëll, an zënterhier steet do an hirer Bio: „E Kand huet Recht op eng Mamm an e Papp.“ De klasseschen homophoben ‘Schlachtruf.’ Hiren (bis elo) leschten Tweet gëtt hiren 25 Followers dann bekannt, dass een déi uewen genannten homophob Petitioun vun hinnen elo bei der Chamber kéint ënnerschreiwen. Ob d’Madame Camarda och dëst ënnerschriwwen huet, kann een net soen. Hiren Numm steet zumindest net öffentlech bei de Signataire vun der Petitioun, dofir awer eben op Twitter… genee do wou d’Madame Camarda Ënn Abrëll stolz bekannt ginn huet, den ILGA Pledge ënnerschriwwen ze hunn…

 

UPDATE (8. Mee 2014; 10:10 Auer):

D’Madame Camarda huet via Twitter eng éischt Reaktioun op dës Diskussioun ofginn. Do heescht et dann “@letz_politblog (…) geet et nach mam Kapp? 40% vun mengen Frenn sin homosexuel!”; “waat leeft? Waat muss ech elo maachen fir aus dem ganzen NonSense eraus ze kommen?”; an huet nach eemol betount: “I engage myself for the Europeans. I fight for the freedom in Europe. I support minorities & I am against any kind of homophobia!”

 


Footnotes

[1] All dës homophob Argumenter gi weiderhi gemaach, obwuel et elo schonns eng ganz Rëtsch vu wëssenschaftlechen Etuden ginn, déi festgehalen hunn dass et Kanner vun homosexuellen Koppelen minimum esou gutt geet wéi deenen vun heterosexuellen Koppelen, a bei verschidde Saachen, wéi e.a. Freed/Glëcklechkeet, esou guer nach besser… Méi op http://www.huffingtonpost.co.uk/2013/06/05/gay-couples-children-happier_n_3388498.html & http://www.freedomtomarry.org/page/-/files/pdfs/SPSSIPsychologicalSocialOutcomesforChildren.pdf

– Den ‘Pledge’ vun ILGA Europe, deen e.a. Madame Camarda ënnerschriwwen huet & hiren offiziellen Statement dozou “Diversity makes us stronger!” ass, kann een hei noliesen: http://www.rosa-letzebuerg.lu/?page_id=1550; http://www.ilga-europe.org/home/how_we_work/european_institutions/ep2014/candidate/signed

– Nimm vun alle lëtzebuergeschen Signataire gëtt et dann hei: http://www.rosa-letzebuerg.lu/?page_id=1550

– A ween den homophoben Text vun „Schutz fir d’Kand“ fir hir Petitioun well liesen, kann dat hei maachen ënner http://chd.lu/ maachen.

Wëllkomm am “neien Amerika”: d’EU muss oppassen, well d’USA kuckt nees nobannen…

Zäit vergeet extrem séier an der Politik – zumindest an der dagdeeglecher Politik. D’Wahlvictoire vun haut, ass d’Wahlnéierlag vu muer. Jiddereen dierf eng Kéier un d’Muecht kommen… Merry-Go-Round, oder sou. Zu Washington D.C. ass de President Obama sou lues op sengem leschten Tour ukomm. D’Land, oder zumindest d’Politiker an der Haaptstad, si schonns an d’Midterms gestart. Mir sinn also elo an de läschte puer Méint wou de 44. President nach iergendeng gréisser Muecht um politeschen Parquet huet. Et gëtt dofir Zäit déi éischt kléng Bilanz vun dëser Presidentschaft ze zéien. 

De Barack Obama wäert d’Wäisst Haus, ausserhalb vun der “Obama Recovery” am Finanzberäich, déi besser ass wéi déi an Europa awer och nach net wierklech richteg boomt, den Enn vun de Kricher a fir “Don’t Ask, Don’t Tell” souwéi der “Energie-Revolutioun”, wuel „just“ mat enger Gesondheetsreform verloossen. Eng Gesondheetsreform, déi och elo nach ëmmer net voll a ganz leeft.

D’Aussepolitik vun den USA huet sech awer wéinst der Innenpolitik verännert. Dat rezenteste Beispill ass wuel de Noen Osten. E Friddensaccord op d’Been ze stellen war d’Zil & et wier, wéi den John Kerry sot, déi läschte Chance dofir. Vun enger soziopolitescher Vue hir, kann een déi Ausso wuel mat béiden Hänn ënnerschreiwen; oder zumindest zréckbehalen dass een Friddensaccord mat all Joer wat vergeet méi (resp. nach méi) onwahrscheinlech gëtt. Béid Säiten schwätzen zënter 2013 nees mateneen. A bei all klénger Differgenz, wann et dann eng gouf, war de Kerry op der Platz fir selwer d’Verhandlungen zeleeden. Vrun e puer Wochen sinn déi dunn méi lues viru gaangen, a vrun e puer Deeg koum deen éischte „GAU.“ Israel hat déi läscht 26 palästinensesch Prisonéier net fräigelooss, Palestina ass doropshin bei d’UN gaangen fir 15 UN Verträg a Konventiounen bäizetrieden, also hire Staat (mat de Grenzen vun 1967) voll & ganz unerkannt ze kréien – egal wat Israel well oder wou Israelis wunnen. Et ass dat wat an der internationaler Sécherheet vu béide Säiten gefaart gëtt, géif domatter schliisslech aktuell israeleschen Territoire praktesch automatesch palästinensesch ginn – an ënnert enger Hamas oder schlëmmer stoen. Israelis fäerten den nächsten Holocaust. A ween ëm säi Liewe fäert, deen attackéiert normalerweis déi aner Persoun am léifsten nach ier een selwer getraff ass.

Keen kann deen Szenario gutt fannen. Weder déi 2 Länner, nach soss een an der internationaler Gemeinschaft. Trotzdem sinn d’Reaktiounen dach awer zimlech non-existent bliwwen – souguer zu D.C.. Obschonns, mat de Midterms dem Obama seng Innepolitik lues a lues op en Enn geet, an hien deemno eigentlech just méi d’Aussepolitik huet, denkt een souguer an der US Haaptstad iwwert déi amerikanesch Roll am Konflikt no. De Kerry huet de politeschen Chefs vu béide Säiten fir d’éischt eng Denkpaus opgebrummt; an, no där kuerzer Paus sollten, an hunn, béid Säiten dann emol alleng verhandelt. [1]

(Esou eng Szene wollt, a well, den John Kerry och fir den Obama gesinn)

Et ass dat wuel een éischt richtegt Zeechen vun deem “neien Amerika.” Een „neit Amerika“ wat e gréisseren Effekt op Europa an op déi ganz Welt kann, a wäert, hunn. Well wat war, ausserhalb vun den USA, déi gréisste Kritik un der US Politik post-9/11? Nee, net den Dronenkrich. Och net d’Verhörungstaktik vun der CIA. Och net de PATRIOT Act. Nope. D’Idee dass d’USA just militäresch aktiv gëtt, wann et ëm dat „schwarzt Gold“ geet. Een Beispill, wat an deem Kontext oft genannt gëtt, ass den Irak Krich (2003). Och wann dat net e ganz gutt Beispill ass, schliisslech hunn d’USA sech um Enn bei den Uellegquellen zréck gehalen an dat Ganzt China iwwerlooss. [2] Firwat? Ënnert anerem well d’USA de Pëtrol net gebraucht huet, geet et am „Land of the Free“ dach an eng komplett aner Richtung.

 

Laut der amerikanescher Energy Information Administration, huet d’USA am Joer 2012 eng 40% vu sengem Petrolkonsum missten importéieren. Dat sinn 20% manner wéi nach 2005. A rechtzäiteg fir déi nächst Wahlen 2016 soll deen Taux op just méi 25% erof falen! [3] Déi amerikanesch Nofro nom Pëtrol ass um déifste Stand zënter 17 Joer. Enger Etude vu „Citigroup“ no, bräicht d’USA a 4 Joer eigentlech just méi Pëtrol vun hirem Noper Kanada z’importéieren fir hire Konsum ze stëllen. [4] Ufank dës Mounts huet d’Energy Information Administration och fir déi alleréischte Kéier en Datum genannt wéini de Pëtrol Import kéint op Null falen: 2037. [5]

Eppes iwwer 40 Joer nom Nixon senger Fuerderung no „American Energy Independence“, déi hien an 10 Joer wollt realiséieren, schéngt dat Joerzéngte laang Zil, wat all US President sech op d’Stir geschriwwen huet, e gutt Stéck méi no zekommen. [6] Dëst huet een direkt Impakt op aner Länner, e.a. Venezuela an Iran sinn haut scho Beispiller dofir. Beim 1. genannten huet e.a. den Abroch beim Export vu Pëtrol an d’USA, d’Inflatioun am Land op iwwer 57% gedréckt an Protester géint de lénksextremen Regime vum Chavez Nofolger Maduro gounge lass. An am Iran konnten déi international Sanktiounen zum groussen Deel just wéinst der Energie-Revolutioun an Amerika duerchgesat ginn.

Eppes wat nieft dem Petrolkonsum fält? D’CO2 Emissiounen, déi elo fir d’USA um nämmlechten Niveau wéi Mëtt de 1990er Joeren sinn, & grad esou wichteg, de Gas Präis! Vru 4 Joer war deen an den USA genee esou deier wéi an Europa. Haut ass den US-Gas 3(!) Mol méi bëlleg. Déi bëlleg Energie bréngt nees Aarbechtsplazen zréck aus Europa – an zemools aus China. No iwwer engem Joerzéngt Abstinenz, wäert „Apple“ nees eng Firma ‘doheem’ opmaachen. Europäesch Risen wéi e.a. „Royal Dutch Shell“, „Vallourec“ an „Voestalpine“ kucken och Richtung USA fir Firmen do opzemaachen. [7]

„All leaders are aware that sustainable and affordable energy is key to keeping factories and jobs in Europe. Industry finds it hard to compete with foreign firms who pay half the price for electricity, like in the United States.“

~ Herman Van Rompuy (2013)

D’Energie-Revolutioun huet an deem Sënn en Effekt op d’US Aussepolitik, dass d’Land net méi an bal all Konflikt op der Welt misst agräifen. Schon alleng aus historescher Siicht wäert een sech, zum Gléck, zwar ni wierklech zréck zéien, wann et ëm d’Sécherheet vun Israel geet, mä et misst een sech ebe keng Gedanken iwwert déi direkt (Energie-)Konsequenzen op säi Land méi maachen (cf. Uellegkris). Wann een déi Suergen net huet, dann huet dëst, laut verschiddenen wëssenschaftlechen Etuden, och een Impakt op d’Entscheedungen vun eise Politiker, egal wou déi elo regéieren. [8] „Pick your battles“ kéint e Motto vun der US Sécherheetspolitik ginn.

Dofir hat am November 2013 den John Kerry gesot: d’Monroe Doctrine ass doud. Déi Doctrine, oder zumindest déi rezentesten Interpretatioun dovun, huet zënter dem 19. Joerhonnert d’US Aussepolitik geprägt. “Krichsmidd” sinn d’Amerikaner no iwwer engem Joerzéngt Afghanistan & Irak och ganz ferm ginn. Dat kann een an allen Ecker gesinn an héieren. E Beispill heifir ass wuel och e.a. scho Libyen an, nach vill méi, Ägypten, wou d’USA nogekuckt hunn wéi den (ëmstriddenen) 1. gewieltene President vum Land vum Militär geputscht gouf. An der aussepolitescher Zensur vun 2013 krut de President Obama dofir och vun der Washington Post, déi him eigentlech politesch misst zimlech nostoen, beim Handhaben vun der Kris an Ägypten een “F”. [9] Verschidde Leit vum Militär, bspw. de fréieren Zaldot & elo US Senator John McCain (R), gesinn „leading from behind“-Taktik vum Wäissen Haus ganz kritesch. Trotzdem géif sech wuel aktuell keen US Politiker trauen ze soen, dass d’Land nees jonk Männer a Fraen soll ëm d’hallef Welt schécken fir e Krich ze kämpfen. Et wier de politeschen Doud. [10]

Krichsmidd & selwer Energie fir d’Haus ze hëtzen. Et ass déi Mëschung, déi et mécht. Et wonnert dofir och net, wann, wéi vrun e puer Wochen geschitt, een amerikaneschen Kolleg, mat Bléck op déi nächst Presidentschaftswahlen, zu engem seet: “Mam Rand Paul wäerte mer eis zumindest net méi an anere Natiounen hir Saachen amëschen.” De Senator Paul (R) vu Kentucky, e Favorit fir 2016, steet fir eng komplett “non-interventionist” Aussepolitik, déi an der eigentlecher Idee vum Monroe eng gréisser Roll gespillt huet, wéi dat an de läschte 70 Joer vun US Politiker interpretéiert ginn ass.

Nation-building at home“, wéi de President Obama et genannt huet, huet Konsequenzen op déi international Politik an do och ganz staark op Europa. De klénge Muechtvakuum um internationale Parquet, deen elo schonns e bësschen ze gesinn ass, gëtt probéiert vum fréieren KGB Agent Putin aus Moskau ze fëllen. Wat dat fir Europa heescht, gesäit een zënter Wochen an der Ukraine – also direkt vrun der Hausdier vun der EU. Et wier schonns alleng dowéinst ubruecht, dass och – oder, gradan dësem Europawahlkampf iwwert eng vergréissert gemeinsam europäesch Aussen- & Sécherheetspolitik géif diskutéiert ginn. Et ass eppes wat de President Obama der EU eigentlech och bei sengem rezenten Tripp op Bréissel un d’Häerz geluecht huet. 

An wee weess, villäicht schwätzen an 100 Joer d’Historiker beim 44. US President net als éischt vu senger Gesondheetsreform, mä dovunner dass d’Land vun dësem „most Wilsonian“ President [11] lues awer sécher op e Wee gesat gouf, deen e.a. der US Aussepolitik eng 180 Grad Kéier erméiglecht huet a sech déi international Politik dowéinst ganz anescht weider entwéckelt huet, wéi een sech dat am Ufank vum 21. Joerhonnert iwwerhaapt konnt virstellen…

Doheem opbauen, fir nobaussen nees ze liichten (cc Jackie)


 Footnotes

[1] Gëschter Mëtteg koum d’Nouvelle dass Israel & Palestina iwwert Deadline vum 29. Abrëll welle weider un engem Friddensaccord bastelen. Béid Länner schéngen (nees) gewellt ze sinn eeschthaft mateneen ze verhandelen, an dëst bei enger „range of issues“, wéi den US Ausseministère gëschter betount huet. http://www.bbc.com/news/world-middle-east-27045312 [en]

[2] Tim Arango an Clifford Krauss (2013), ‘China Is Reaping Biggest Benefits of Iraq Oil Boom’ – http://www.nytimes.com/2013/06/03/world/middleeast/china-reaps-biggest-benefits-of-iraq-oil-boom.html?pagewanted=all&_r=0 [en]

[3] Michael Bastasch (2014), ‘US set for energy independence, while other countries set for dependence’ http://dailycaller.com/2014/01/22/us-set-for-energy-independence-while-other-countries-set-for-dependence/ [en]

[4] Stephen Keppel (2013), ‘U.S., Mexico and Canada Could Become Energy Independent’ http://fusion.net/abc_univision/story/us-mexico-canada-verge-energy-independence-16116 [en]

[5] Et gouf an de läschte Joeren vill Progrès bei Energie-Onofhängegkeet gemaach. Trotzdem ginn et nach e puer Hürden ze huelen fir zumindest no un déi Null erun zekommen. – http://www.vox.com/2014/4/9/5590002/what-would-it-take-for-the-us-to-become-oil-independent [en]

[6] Wéi de Nixon dat Zil ausginn huet, huet d’USA 35% vun hirem Petrol missten importéieren. 2005 huet déi Zuel mat 60% säin Héichpunkt erreecht. Haut ass et zréck op 40%, 2016 dann op 25%. – http://www.politico.com/magazine/story/2013/11/congratulations-america-youre-almost-energy-independent-now-what-98985.html#.U01mnuaSyaJ [en]

[7] D’Energie-Revolutioun ass ebenfalls ganz gutt fir d’Sanéierung vum Budget. 2013 huet een nach eng $300 Milliarde fir den Import vu Petrol missten ausginn. Dat sinn 2/3tel vum ganzen „Trade Budget.“ Déi Suen wäerten bei Energie Onofhängegkeet vum Land ëmmer méi an d’USA selwer investéiert ginn. – http://www.bbc.com/news/business-23151813 [en]

[8] Council on Foreign Relations, Etude [pdf]

[9] Den „F“ fir d’Kris an Ägypten war déi schlechtesten Note déi den Obama vun der Washington Post an där Zensur krut. – http://www.washingtonpost.com/blogs/worldviews/wp/2013/12/31/obamas-foreign-policy-report-card-for-2013/ [en]

[10] Zënter 2005 glëwen méi Amerikaner dass d’US Regierung ze vill Suen an d’Militär stécht wéi ëmgedréit. „Ze vill“ Suen respektiv „genee richteg“ huet d’Majoritéit bei alle politeschen Parteien. Demokraten 83%, Independents 70% an Republikaner 49%. Déi gréissten Oppositioun („ze wéineg“) ass bei de Republikaner awer och just 49%. A ween net nach méi Suen an d’Militär well stiechen, well normalerweis och net säi Famillienmember an eng Krichszone schécken. – http://www.gallup.com/poll/167648/americans-remain-divided-military-spending.aspx [en]

[11] Ondrejcsák Róbert, ‘American Foreign and Security Policy under Barack Obama: change and continuity’ –  http://cenaa.org/analysis/american-foreign-and-security-policy-under-barack-obama-change-and-continuity/ [en]